Қаерга бораяпмиз?
Учамиз? Қаерга?
Ҳа, керак, пул керак, лекин буни учишга нима алоқаси бор?
У давлатда пул кўп эканми? Айтмоқчиманки топиш осон эканми?
Чиройли шаҳар экан, бизни кутиб олганлар жуда ҳам хурсанд кўринишади, уларда ишчи кучи етишмаса керак-а?
Шаҳарни айланмаймизми?
Биз шаҳардан ташқарида ишлаймизми?
Афсус, чиройли шаҳар экан…поездда борамиз? Қаерга?
Йўл узоқ экан, бояги шаҳарда қолишнинг сира иложи йўқмиди?
Ишлаймиз, ишлаш учун келганмиз, тушундим, лекин…келдикми?
Қоронғуда юриш шартми? Нимаси қулай?
Атрофда симтўрлар, чегарами? Яна чегарадан ўтамизми?
Қизиқ, пост кўринмайди…қаерга югуришимиз керак? Нега югуришимиз керак?
Нега қўполлик қилишади? Қаердамиз? Бошқа давлат? Қайси давлат? Нега булар ҳарбий кийимда?
Паспортим ўзимда, ҳа, нега сўраяпсиз? Керак? Майли, қачон қайтарасиз?
Бу ер шаҳарга ўхшамайди-ку? Қишлоқ ҳам эмас, қаердамиз? Яна нега қўполлик қилишяпти, бошқача кутиб олишган эдику? Ҳа, айтганча, аэропортда кутиб олганлар қани? Паспортни қайтаришмади, кейинроқ, қачон?
Биз ишлагани келган эдик, нега бизга дарс ўтишмоқчи, кимёдан билимим бор-йўқлигини нима аҳамияти бор?
Биламан, олтингугурт билан бир нималарни аралаштириб пақиллатса бўлади, лекин бунинг бу ерда нима кераги бор? Ёки жойни аввал портлатиб кейин текисланадими? Унда тушунарли, лекин, ҳарбий кийимда юрилиши барибир ғалати, тўғрими?
Бу ниқобми? Нимага керак? Айтмоқчи эдимки юзни ёпиш нимага керак бўлиб қолди? Ёки бу ерларда кучли шамол бўладими?
Ташаккур, камарим бор, бу ҳам шарт? Нега бу матодан? Ғалати экан, симлар нима учун керак?
Ғалати ҳолат, нега ҳамма менга қараб турибди?
Анави йигит нега йиғлаяпти?
Нега ҳамма мени мақтаяпти?
Бир ўзим боришим шартми?
Уларнинг тилини билмайманку?
Ўзлари кутиб олишади?
Мени танишадими?
Қизиқ, нега бир ўзимни бу палаткага юборишди?
Тиббиёт ходимларими?
Нега белим қизияпти? Ёки белбоғ қиздиряптими? Борган сари қизиб бормоқда, ечиб ташласаммикан? Нега ҳамма қочаяпти?
Қаердан бундай баланд овоз эшитилмоқда? Портлашнинг овозими?….