Сайлов кампаниясига старт берилди. Энди партиялар ўз электоратини кенгайтириш учун курашни бошлайди. Бунда ҳалоллик асосий мезон бўлишини истардик. Бошқа партиянинг камчиликлари ҳисобига ўз партиясини илгари суриш яхши эмас. Кучли одамлар, ташкилотлар ўзларининг фазилатлари ҳисобига обрў топадилар, бировнинг камчиликлари эвазига эмас.
Агар партиялар шу кеча-кундуздаги каби услуб ва темпда ишлайдиган бўлсалар, уларнинг бешовини бирлаштирсак ҳам бўлаверади. Партия ўзининг аниқ дастури била ажралиб турмас экан, уни алоҳида молиялашда маъно йўқ, қўшимча харажат, холос. Партияларнинг фақатгина сайлов кампанияси доирасида фаоллашуви эса кейинги чақириқда кўпроқ мандатга эга бўлишдан ўзга нарса эмас, деб ўйлайман.
Халқ кўриб-билиб турибди, энди уларни баландпарвоз гаплар билан алдаб бўлмайди.
Бир партиянинг йиғилишида фикр билдириш сўралганда айтганим бор, бу йилги сайловларга, керак бўлса, сиз ғалаба қозонсангиз қабул қилинадиган қонунлар рўйхати билан чиқинг деб. Муаммолар етарли. Марҳамат, айтинг бизнинг партия ғалаб қозонса мана бу масалаларни ҳал қилиб ташлаймиз, деб. Кўпчилик охиригича ўқишга эринадиган катта дастур билан келасиз, халқ ҳам тезроқ сайлов ўтсин, майли шулар ҳам ҳаракат қилибдику деб овоз бериб қўя қолади, деган умид билан юрасиз.
5 та партия ҳизилакам сиёсий кучми?! Бири тадбиркорларни, бири ўқитувчи-ю шифокорларни, бошқаси пенсионерларни, яна бири ҳуқуқи бузилганларни, кейингиси табиатни асраш бўйича ростакам ишласа борми, ҳақиқатан ҳуқуқий-демократик давлатга айланиб қоламиз. Лекин амалдачи? Тадбиркорларнинг мулк ҳуқуқи дахлсизлиги масаласи ижтимоий тармоқларни ларзага келтириб ётибди, ойлик маошларнинг ошиши билан нархларнинг ошиши орасида номутаносиблик, ҳуқуқи бузилган фуқаролар, кесилган дарахтлар…ҳурматли партиялар, сизнинг иштирокингиз кўринмаяпти.
Тўғри, халқ сифатида биз ҳам сиздан талаб қилишимиз керак. Биз ҳам бўшмиз, бирингиз таниш, кейингингиз қариндош, барибир фойдаси йўқ, деб сайловларга жиддий қарамайдиган бўлиб қолганмиз. Лекин сиз бундан фойдаланманг. Бизнинг сиёсий онгимизни ўстиринг, бизни фаол бўлишга мажбур қилинг. Бизни партияларга аъзо бўлишга қизиқтиринг. Биз ҳам билайлик, хурсанд бўлайлик, партияга аъзо бўлсак, катта ишларда фойдамиз тегаркан, мана бу қонунларни қабул қилинишида иштироким бор экан, мен фидойи инсон эканман, юрт тақдирига бефарқ эмас эканман, деб.
Ҳозирча эса ишонч йўқ, чунки аниқ таклифлар йўқ. Фақат катта-катта дастурлар…